Se decidiches consentir o teu corpo e, sobre todo, o teu padal, propoñémosche o restaurante España. Onde o cociñeiro Héctor López conseguiu unha calidade óptima nas súas exquisitas carnes outorgando os mellores coidados aos bois que cría na súa propia granxa, a cal poderás visitar. Tamén poderás renovar mente e corpo descubrindo novas paraxes ou gozando de tratamentos termais nunha contorna privilexiada.

Esta experiencia levarache ás orixes do corazón da Ribeira Sacra a través dos sentidos. No restaurante Nova, Daniel Guzmán e Julio Sotomayor encargaranse de ofrecerche unha “cociña de raíces”, na que cada elaboración tenta plasmar unha base gastronómica herdada dos seus maiores, onde cada ingrediente suma. Despois de consentir o teu padal, regálalle á vista unha paisaxe espectacular desde os ceos ou consente a túa pel mediante balneoterapia.

Javier Olleros e o seu equipo busca espertar os sentidos e conectalos coas emocións, tan fácil e tan complicado como iso. Procúrano creando “experiencias gustativas” –así é como lles gusta denominalas–, cheas de matices, en aparencia efémeras pero perdurables na memoria culinaria. Ademais desta “terapia” gastronómica, poderás tamén desconectar a través dunha pequena escapada á Ría de Arousa ou bañarte nun balneario nun lugar emblemático de Galicia.

No restaurante de Alberto González Prelcic parten das bases da cociña tradicional, guisos pausados, brasas de leña de carballo, repostería artesá… e adaptan os pratos aos tempos actuais, utilizando as novas técnicas da cociña moderna e empapándose co bo que vén de fóra, collendo substancia, crecendo… Fan unha cociña eminentemente galega, influenciada por todo aquilo que nos rodea e nos enriquece. Se queres coidar o teu corpo co mesmo mimo que coidan os ingredientes en Silabario, poderás relaxarte nun balneario ou gozar facendo enoturismo.